धादिङका दलित समुदायले थर संशोधनको लागि सास्ती खेप्नुपरेको गुनासो

धादिङ,२८ मंसिर
धादिङका दलित समुदायले नागरिकतामा थर संशोधनको लागि धेरै समस्या भोग्ने गरेको गुनासो गरेका छन् ।
दलित समुदायले आफ्नो अपमानित नाम र हिनताबोधका थर संशोधन गर्न जिल्ला प्रशासन कार्यालय जाँदा झन्झट व्यहोर्नुपर्ने सहभागीले बताएका हुन् ।बुधबार राष्ट्रिय दलित आयोगका सदस्य सुन्दर पुर्कुटिको अध्यक्षता धादिङवेशिमा सम्पन्न भएको दलित हक अधिकार कार्यन्वयन सम्बन्धमा छलफलमा सो कुरा उठेको हो ।

त्यस्तै कार्यक्रममा राष्ट्रिय दलित आयोगका सदस्य सुन्दर पुर्काेटिले पुष मसान्तसम्म छुट भएका थरहरु सूचीकरणमा राख्ने योजनामा रहेको बताउनुभयो ।प्रशासनमा जातीय विभेदका उजुरीहरु अहिलेसम्म नआएको प्रमुख जिल्ला अधिकारी कृष्ण प्रसाद लम्सालले जानकारी दिनुभयो ।

त्यसैगरी आज नीलकण्ठ नगरपालिकामा दलित हक अधिकार सम्बन्धी नीति कार्यक्रम योजना तथा व्यवस्थामा पनि छलफल गरेको छ । दलितहरुको परम्परागत पेशालाई व्यवसायीकरण गर्न आवश्यक आर्थिक सहयोग, अनुदान तथा थप तालिमको व्यवस्था गरिने , दलित तथा विपन्न वर्गको आर्थिक सामाजिक र वर्गीय हीत संरक्षण गर्न लक्षित दलित समुदाय दलित सम्बद्ध संघ संस्था र विभिन्न निकायसँग नीलकण्ठ नगरपालिका सहकार्य गर्न तयार रहेको उपप्रमुख दिपक विश्वकर्माले बताउनुभयो ।