ज्वालामुखीमा जिल्लाकै ठुलोे खानेपानी आयोजना स्विकृत,अध्यक्ष दनै भन्नुहुन्छ्, “खानेपानी खुवाउने एउटा सपना पुरा हुने भयो”

धादिङ,२ कात्तिक ।
धादिङको ज्वालामुखी गाउँपालिकाको लागि बुढीगण्डकी मैदीकोट बृहत खानेपानी आयोजना स्विकृत भएको छ।संघीय खानेपानी तथा ढल व्यवस्थापन आयोजना भरतपुर चितवन र ज्वालामुखी गाउँपालिकाको साझेदारीमा निर्माण हुने उक्त खानेपानी आयोजना जिल्लाकै ठुलो लगानीमा सम्पन्न हुने आयोजना रहेको ज्वालामुखी गाउँपालिकाका अध्यक्ष यमनाथ दनैले जानकारी दिनुभयो।

खानेपानीको समस्या भोगीरहेका ज्वालामुखी गाउँपालिकाको वडा नम्बर १,२,३ र ४ वटा वडालाई लक्षित गरी स्विकृत भएको खानेपानी आयोजना जिल्लाकै ठुलो लगानीमा सम्पन्न हुने खानेपानी आयोजना हो ।कुल ६० करोड ६१ लाख ६३ हजार ४४१ अनुमानित बजेट रहको उक्त खानेपानी निर्माणको लागि स्थानीय तहले १ प्रतिशत रकम जम्मा गर्नुपर्ने प्रावधान रहेको दनैले बताउनुभयो।

गाउँपालिकाले कुल लागत रकमको एक प्रतिशत अर्थात ६० लाख ६१ हजार ६३४ रुपैँया सम्बन्धित कार्यालय र उपभोक्ता समितिको संयुक्त खातामा जम्मा गर्नुपर्नेछ । गाउँपालिका र उपभोक्ता समितिले रकम जम्मा गरेपछि यस आर्थिक बर्षमा ५ करोडको काम हुनेछ । क्रमिक रुपमा हुने उक्त खानेपानी आयोजना प्रविधियुक्त रहने गाउँपालिकाले जनाएको छ ।

खानेपानी आयोजना कार्यविधि अनुसार आयोजना सुरु हुन अगावै रकम जम्मा गर्नको लागि संघीय खानेपानी तथा ढल व्यवस्थापन आयोजना भरतपुर चितवने ज्वालामुखी गाउँपालिकालाई चिठ्ठी काटेर जानकारी गराएको छ ।मैदीकोटमा ट्याकी निर्माण गरी पानी वितरण गर्ने योजना रहेको गाउँपालिका अध्यक्ष यमनाथ दनैले जानकारी दिनुभयो।

खानेपानी आयोजना निर्माण भएसँगै १,२,३ र ४ वडाका ४ हजार घरधुरीका हजारौँ नागरिकहरु लाभान्वित हुनेछन्।बुढीगण्डकी मैदीकोट बृहत खानेपानी आयोजना स्विकृत भएसँगै गाउँपालिकाका अध्यक्ष दनैले आफ्नो नागरिकहरुलाई पानी खुवाउने एउटा सपना पुरा हुने चरणमा रहेको बताउनुभयो ।निर्वाचन अघि आफुले गरेको वाचा अनुसार काम भएको भन्दै अब छिट्टै प्रक्रियाहरु पुरा गरेर संघ र प्रदेशको निर्वाचन पछि शिलान्यास गर्नेगरी काम अघि बडाईने दनैले धादिङ सन्चारलाई बताउनुभयो ।

गाउँपालिका भित्र रहेको खानेपानी समस्या समाधान गर्ने कार्य अनुसार आफुले ज्वालामुखी गाउँपालिकाको वडा नम्बर ६ र ७ वडामा आँखुखोलाबाट लिफ्टििङ गरेर पानी ल्याउनको लागि पहल गरीरहेको बताउनुभयो ।विभिन्न मन्त्रालय र संघ संस्थासँग समन्वय गरेर गाउँपालिकामा ठुला योजनाहरु ल्याउने चरणमा रहेको समेत दनैले बताउनुभयो । जनताको सेवा गर्नको लागि आफु राजनीतिमा आएको भन्दै अबको एक बर्षपछि देखीने गरी विकास निर्माणको काम हुने बताउनुभयो ।