धादिङ अस्पतालमा सुरु भयो डायलाइसिसको उपचार

धादिङ,२६ साउन।
सदरमुकाम धादिङबेशीमा रहेको धादिङ अस्पतालले बिहीबारदेखि डायलाइसिसको उपचार सुरु गरेको छ । बिहीबार डा.दिनेश रेग्मीको टोली र तालिमप्राप्त नर्स अस्मिता भुषालको टोलीले मृगौलाका बिरामी त्रिपुरासुन्दरी गाउँपालिका वडा नं २ सल्यानटारका पदम बहादुर थपलियाको डायलाइसिस गर्दै सेवा सुरु गरेको हो ।

बागमती प्रदेश सरकारको सहयोगमा सुरु भएको सेवाको गत शनिबार बागमती प्रदेशका मुख्य मन्त्री एवम् एकीकृत समाजवादीका उपाध्यक्ष राजेन्द्र पाण्डेले शुभारम्भ गर्नुभएको थियो ।

धादिङ अस्पताल व्यवस्थापन समितिका अध्यक्ष महेन्द्र धमलाले बढी खर्चिलो हुने र विरामीले विभिन्न समस्या भोग्नु परेका कारण उनीहरुलाई सहज बनाउन धादिङ अस्पतालमै डायलाइसिस सेवा सुरु गरिएको बताउनुभयो । चार वटा डायलाइसिस उपकरणसहित व्यवस्थापन गरिएको सेवाले पहिलेदेखि डायलाइसिस गरिरहेका विरामी लाभान्वित हुने उहाँको भनाई छ ।

सेवा शुभारम्भ भएसँगै जिल्ला बाहिर पुगेर डायलायसिस गराईरहेका विरामीहरुलाई खवर गरिरहेको र उहाँहरु अब आफ्नै जिल्लामा डायलायसिस सेवा लिन आउने अस्पतालका सूचना अधिकारी बिक्रम बि.कले जानकारी दिनुभयो ।

धादिङमा डायलाइसिस सेवा नहुदा नागरिकहरुलाई काठमाडौँ, चितवन लगायतका ठाउँमा जानुपर्ने बाध्यता रहेको थियो ।अहिले जिल्लामै उक्त सेवा शुभारम्भ भएपछि डाएलाइसिस गराउनुपर्ने बिरामीहरुलाई सहज भएको छ ।