शान्ति, अहिंसा र सदाचारका लागि धादिङको नेत्रावती डवजोङमा सामूहिक मौन ब्रत

धादिङबेशी । बहुसङ्ख्यक हिन्दू धर्मावलम्बी पशुबलि दिएर दशैँ मनाइरहेका बेला बौद्धधर्मावलम्बी भने फूलपातीदेखि गुम्बाहरुमा न्युङ्ने अर्थात् मौन ब्रत बसिरहेका छन् । पानी पनि नखाई उनीहरु दशैँमा बलि दिइने प्राणीहरुको आत्माको शान्तिको कामना गर्दै मौन व्रत बसेका हुन् ।

धादिङको नेत्रावती डवजोङ गाउँपालिकाको तिखाढुङ डबजोङ बौद्ध गुम्बाको आयोजनमा नेत्रावती डवजोङ गाउँपालिका वडा न २ स्थित तिखाढुङ र धाराधिरीमा दशैंमा बलि दिइएका पशुपक्षीको आत्माको शान्तिका लागि बौद्धधर्मावलम्बीले मौन ब्रत बसी ध्यान गरिरहेको छन् ।

जीवनमा जानी वा नजानी गरिएका कुकर्म र पापबाट मुक्त हुने विश्वासका साथ बौद्धधर्मावलम्बी न्युङ्ने व्रत बस्ने चलन रहेको छ । ङ्युङ्ने व्रत मनलाई शान्त र धैर्य हुन सिकाउने एक किसिमको ध्यान अर्थात् उपसना हो । बौद्ध धर्मावलम्बी विभिन्न समयमा न्युङ्ने व्रत बस्छन् । दशैँमा बस्ने न्युङने व्रतको भने छुट्टै महत्व रहेको नेत्रावती डवजोङ गाउँपालिकाबाट बिजय कुमार तामाङले बताउनु भयो ।

पहिले पहिले गुम्बामा लामागुरुहरु मात्र न्युङ्ने ब्रत बस्ने गर्थे तर हिजोआज युवा र बालबालिका पनि उत्सुकताका साथ न्युङ्ने बसिरहेका छन् । न्युङ्ने बस्दा आफूले चाहेको कामना पूरा हुने र परिवारमा समेत सुखशान्ति हुने विश्वास रहेको तामाङको भनाइ छ ।

हाल जगबहादुर तामाङको नेतृत्वमा नेत्रावती २ स्थित तिखाढुङ १३ जना र ठिल्देन कमान गुम्बा खम बा तामाङ भनिने कर्मा दोर्जे लामा गुरुङको नेतृत्वमा धाराधिरीमा २८ जनाले न्युङ्ने ब्रतमा सहभागी भएका छन् । उनिहरुले बिजयदशमीको दिन अर्थात भोली बिहान सम्म ब्रत जारी राख्ने बताएका छन् ।