धार्के सितापाइला सडकखण्डमा सवारी दुर्घटना: एक जना पैदल यात्री गम्भीर घाइते

धुनिवेशी ,२० साउन  । धुनिवेशी नगरपालिका–५ स्थित धार्के सितापाइला सडक खण्डमा आज दिउँसो साढे १ बजे पैदल यात्रीलाई ठक्कर दिँदा एक व्यक्ति गम्भीर घाइते भएका छन्। काठमाडौँबाट धार्के तर्फ जाँदै गरेको हात्ती गाडी (बा.प्र.०१–०२५ च ९४८९) ले स्थानीय बिक्कि तामाङलाई ठक्कर दिएको हो।

दुर्घटनामा परेका तामाङको टाउको र दाहिने कोखामा चोट लागेको छ। गम्भीर अवस्थामा रहेका घाइतेलाई तत्काल उपचारका लागि काठमाडौँ तर्फ पठाइएको प्रहरीले जनाएको छ।

घटनाको खबर प्राप्त हुनासाथ इलाका प्रहरी चौकी जिवनपुरबाट प्रहरी निरीक्षक विजय प्रसाद यादवको नेतृत्वमा प्रहरी टोली खटिएको थियो। हात्ती गाडी र त्यसका चालकलाई नियन्त्रणमा लिइएको छ भने घटनास्थलमा बाटो अबरुद्ध नभएको जनाइएको छ। प्रहरीले घटनाको थप अनुसन्धान गरिरहेको जनाएको छ।