नीलकण्ठमा कर्मचारी क्षमता विकास तालिम सम्पन्न, जनमैत्री सेवामा जोड

धादिङ, १४ असार । नीलकण्ठ नगरपालिकाको आयोजनामा सञ्चालित दुईदिने “कर्मचारी क्षमता विकास तालिम“ सम्पन्न भएको छ । असार १३ र १४ गते संचालित तालिमले जनसेवा प्रभावकारी, छरितो र जनमैत्री बनाउन निर्देशन र मार्गदर्शन गरेकोे छ ।

तालिम समापन समारोहलाई सम्बोधन गर्दै नगरप्रमुख भीम प्रसाद ढुंगानाले जनताको काम छिटोछरितो र सम्मानपूर्वक सेवा दिनुपर्नेमा जोड दिनुभयो । उहाँले भन्नुभयोे, “हुनसक्ने कामलाई तत्काल टुंगो लगाउनुहोस्, नसकिए स्पष्ट कागजातको जानकारी दिनुहोस् । सेवाग्राही अप्ठ्यारोमा नपरोस् भन्ने हाम्रो प्राथमिकता हुनुपर्छ ।”

कार्यक्रममा प्रमुख प्रशासकीय अधिकृत पुरुषोत्तम सुबेदीले कानुनबमोजिम आएका सेवाग्राहीका काम तत्काल सम्पन्न गर्न कर्मचारीहरूलाई आग्रह गर्नुभयो । उहाँले नगरपालिकाले सम्मानजनक सेवा प्रवाहमा सुधार ल्याउँदै आएको उल्लेख गर्नुभयो ।

तालिममा नेपाल सरकारका पूर्व सचिव डा. दामोदर रेग्मी र प्रशिक्षक रामहरि खत्रीले सहजीकरण गर्नुभएको थियो । नगरपालिकाले यस किसिमका तालिमहरू नियमितरूपमा सञ्चालन गरी कर्मचारीहरुको क्षमता अभिवृद्धि गरि सेवा गुणस्तरमा निरन्तर सुधार गर्ने प्रतिबद्धता जनाएको छ ।