जनस्वास्थ्य कार्यालय धादिङद्धारा निक साइमन्स अवार्ड थापालाई सम्मान

धादिङबेशी । जनस्वास्थ्य कार्यालय धादिङले निक साइमन्स अवार्ड ढोला स्वास्थ्य चौकीमा कार्यरत स्वास्थ्य चौकी प्रमुख जनस्वास्थ्य निरिक्षक रविन थापालाई सम्मान गरेको छ । थापाले आ.व २०८०/०८१ मा जिल्ला भरीमा MSS मा उत्कृष्ठ नतिजा हासिल गर्नु भएको थियो ।

राष्ट्रिय स्वास्थ्य तालिम केन्द्र र निक साइमन्स इन्स्टिच्युटको मूल्याङ्कनमा नेपाल भरीमा प्रथम भई निक साइमन्स अवार्ड बाट सम्मानित हुनु भएकोले शुक्रबार धादिङबेशीमा एक कार्यक्रमको आयोजना गरि जनस्वास्थ्य कार्यालयले समेत सम्मान गरिएको जनस्वास्थ्य कार्यालय धादिङका निमित्त कार्यालय प्रमुख विभु कुमार झाले बताउनु भयो ।

बधाई तथा सम्मान कार्यक्रममा धादिङ अस्पतालका निमित्त अस्पताल निर्देशक डा.गगन कुमार अधिकारी, आयुर्वेद तथा वैकल्पिक चिकित्सालयका कार्यालय प्रमुख अमुल्य दाहाल, ज्वालामुखि गाउँपालिकाको स्वास्थ्य शाखा प्रमुख श्री सुजन श्रेष्ठ, सिद्धलेक गाउँपालिकाको स्वास्थ्य शाखा प्रमुख शंकर बाबु दुवाडी लगाएतको उपस्थिति रहेको थियो ।

ग्रामीण क्षेत्रमा रहेर उत्कृष्ट स्वास्थ्य सेवा प्रदान गरे बापत  थापालाई निक साइमन्स इन्स्टिच्युटले सम्मान गरेको थियो । थापालाई १३ औँ ग्रामीण स्वास्थ्यकर्मी सम्मेलनको उदघाटन समारोहमा स्वास्थ्य मन्त्री प्रदीप पौडेलले उक्त अवार्ड प्रदान गर्नु भएको थियो ।