आयोजकलाई हराउदै एमवाईसीले जित्यो प्रथम सुमन स्मृति कपको उपाधि

धादिङ,१८ फागुन

आयोजक धादिङ फुटबल क्लबलाई हराउदै प्रथम सुमन स्मृति कपको उपाधि मित्र युवा क्लब(एम.वाई.सी.)ले जितेको छ । शनिवार सम्पन्न भएको फाईनल खेलमा धादिङ फुटबल क्लव (डि.एफ.सी.)लाई २–० गोल अन्तरले पराजित गर्दै एम.वाई.सी.ले उपाधि रक्षा गरेको हो । फाईनलमा पराजय भोगेको धादिङ युवा क्लब भने उप बिजेतामा चित्त बुझाएको छ । उपाधि विजेता एम.वाई.सी. क्लवका खेलाडीलाई एक लाख ७५ हजार नगदसहित ट्रफी, मेडल र प्रमाणपत्र प्रदान गरिएको छ ।

त्यस्तै उपविजेता डि.एफ.सी.लाई ७५ हजार र तृतिय हुने शिवदल गण र सेभेन हर्सका खेलाडीलाई २५ हजार नगदसहित ट्रफी, मेडल र प्रमाणपत्र प्रदान गरिएको छ ।प्रतियोगिताको उत्कृष्ट प्रशिक्षक एम.वाई.सी.का सञ्जय सापकोटा ‘मित्र’, उत्कृष्ट खेलाडी एम.वाई.सी.का अनिल राना मगर, उत्कृष्ट गोल किपपर एम.वाई.सी.का सफल खत्री, उच्च गोलकर्ता शिवदल गणका सरोज श्रेष्ठ र उदयमान खेलाडी डि.एफ.सी.का समिर गु्रुङलाई नगदसहित ट्रफी र प्रमाणपत्र प्रदान गरिएको छ ।

नीलकण्ठ नगरपालिकाका नगर प्रमुख भीम प्रसाद ढुंगानाको प्रमुख आतिथ्यतामा प्रतियोगिता सम्पन्न गरिएको हो । समापन समारोहलाई सम्बोधन गर्नुहुदै नगर प्रमुख भीम प्रसाद ढुंगानाले नगरपालिकाले खेल क्षेत्रलाई उच्च प्राथमिकतामा राखेर बजेट बिनियोजन गरीरहेको बताउनुभयो । खेल मैदान निर्माणको लागि नगरपालिकाले बजेट बिनियोजन गरेर छेकबारको काम सम्पन्न भएको भन्दै प्याराफिट निर्माणको चरणमा रहेको बताउनुभयो।