रामकोट दरबारलाई विशेष अनुदान मार्फत बजेट बिनियोजन गर्छुः मन्त्री बिमल ठकुरी

धादिङ,४ फागुन
नीलकण्ठ नगरपालिका वडा नम्बर ८ स्थित रामकोट दरबार निर्माणको लागि सहयोग गर्ने बागमती प्रदेशका सस्कृती तथा पर्यटन मन्त्री बिमल ठकुरीले बताउनु भएको छ।रामकोट दरबारमा राम शाहको शालिक अनावरण कार्यक्रमलाई सम्बोधन गर्नुहुदै उहाँले रामकोट दरबारलाई संरक्षण र पुर्ननिर्माणको लागि प्रदेश सरकारले सहयोग गर्ने बताउनुभयो ।

ऐतिहासिक महत्व बोकेको रामकोट दरबारलाई आगामी बर्षदेखी बहुबर्षिय योजनामा राखेर सहयोग गर्ने बताउनुभयो ।कला र संस्कृतिमा धादिङ जिल्ला अग्रणी स्थानमा रहेको भन्दै उहाँले यसको संरक्षण र प्रचार प्रसार गर्नुपर्ने बताउनुभयो । नगर प्रमुख भीम प्रसाद ढुंगानाको आग्रह बमोजिम काम गर्ने स्पष्ट पार्नुभयो । यसैगरी कार्यक्रमलाई सम्बोधन गर्नुहुदै नेपाल नगरपालिका संघका अध्यक्ष एवं नीलकण्ठ नगरपालिकाका नगर प्रमुख भीम प्रसाद ढुंगानाले नगरपालिकाले नगरभित्र रहेको ऐतिहासिक तथा धार्मिक स्थलको संरक्षणको लागि बजेट बिनियोजन गरेर काम गरीरहेको बताउनुभयो ।

रामकोट दरबार क्षेत्रको पुर्ननिर्माणको लागि नगरपालिकाले यस आर्थिक बर्षमा काम सक्ने गरी २० लाख रुपैँया बजेट बिनियोजन गरेको बताउनुभयो । मन्त्री लगायतको टोलीले रामकोट दरबारको भग्नावशेष लगायत तिनतले भिरमा निर्माण भईरहेको नीलकण्ठ र्पाकको समेत स्थलगत अनुगमन गरीएको छ ।

अनुगमनमा बागमती प्रदेशका सस्कृती तथा पर्यटन मन्त्री बिमल ठकुरी, नगरप्रमुख भीम प्रसाद ढुंगाना,पर्यटन सचिव दीपेन्द्र सुवेदी,प्रवक्ता तथा वडा अध्यक्ष प्रकाश कुमार श्रेष्ठ,नेपाल नगरपालिका संघका सल्लाहकार सरोज अधिकारी,नीलकण्ठ नगरपालिकाका सल्लाहकार दिपक कोईराला लगायतको सहभागिता रहेको थियो ।पुरातत्व विभागले ५ सय बर्ष अघिको संरचना भनेर प्रमाणित गरीसकेको वडा अध्यक्ष प्रकाश कुमार श्रेष्ठले जानकारी दिनुभयो । वडा अध्यक्ष श्रेष्ठले रामकोट दरबारको ऐतिहासिक महत्व,त्यहाँ भएका भग्नावशेषहरुको बारेमा मन्त्री लगायतको टोलीलाई सहजिकरण गर्नुभएको थियो ।