नीलकण्ठमा एच.पि.भि खोपको तयारी पुरा, माघ २२ देखि २६ गतेसम्म खोप अभियान

धादिङ,१२ माघ

महिलाहरुमा हुने पाठेघरको क्यान्सर रोक्नको लागि नीलकण्ठ नगरपालिमा एच.पि.भि खोप अभियान सन्चालन गरिने भएको छ । एच.पि.भि खोपको अन्तिम तयारी तथा त्यसको ब्यवस्थापनका बारेमा सरोकारवाला निकायसँग शुक्रबार अन्तरक्रिया कार्यक्रम सम्पन्न गरीएको छ । नीलकण्ठ नगरपालिकामा माघ २२ गतेदेखी २६ गते सम्म खोप अभियान सन्चालन गरिने बरिष्ठ जनस्वास्थ्य अधिकृत विष्णु रिजालले जानकारी दिनुभयो । नीलकण्ठ नगरपालिकाको १४ वटै वडाका ५७ खोप केन्द्रबाट खोप अभियान सन्चालन गरीने जनस्वास्थ्य अधिकृत शिव रानाले जानकारी दिनुभयो ।

कक्षा ६ देखि १० सम्म अध्ययनरत छात्रा तथा विद्यालय बाहिर रहेका १० देखि १४ वर्ष उमेर समूहका बालिका र किशोरीलाई एचपिभि खोप लगाईने निर्णय गरिएको छ ।सरोकारवालाहरूलाई एचपिभि खोप अभियानको महत्व, कार्यान्वयन प्रक्रिया, खोपको प्रभावकारिता, र अभियानलाई सफल बनाउन सामुदायिक सहयोग, समन्वय, तथा सञ्चालनका उपायहरूका बारेमा नीलकण्ठ नगरपालिकाका वरिष्ठ जनस्वाथ्य अधिकृत स्वास्थ्य शाखा प्रमुख विष्णु रिजालले जानकारी गराउनुभयो । खोप अभियानलाई सफल बनाउन सबै पक्षहरूको सक्रिय सहभागिताको अपेक्षा गरिएको छ । खोप अभियानमा बालिकाको सहभागिता सुनिश्चित गर्न नीलकण्ठ नगरपालिकाले विशेष पहल गर्ने जनाएको छ।

नीलकण्ठ नगरपालिकाको ३८ वटा विद्यालय र १९ वटा स्वास्थ्य संस्थाबाट खोप अभियान सन्चालन गरिने नगरपालिकाले जनाएको छ । यसैगरी कक्षा ६ देखी १० सम्मका ३ हजार २७ जना बालिका र विद्यालय नजाने १० देखी १४ बर्षका १९६ जना बालिका गरी ३ हजार २ सय २३ जना बालिकालाई खोप लगाईने लक्ष्य राखिएको छ। खोप अभियान अवधिभर ३० जना खोप कार्यकर्ता र ७६ जना स्वयंसेवक खटाइने नगरपालिकाले जनाएको छ । कार्यक्रममा नीलकण्ठ नगरपालिकाका नगर प्रमुख भीमप्रसाद ढुंगाना,नगर उपप्रमुख दीपक विश्वकर्मा, प्रमुख प्रशासकिय अधिकृत पुरुषोत्तम सुवेदी, वरिष्ठ जनस्वास्थ्य अधिकृत विष्णु रिजाल, नगर प्रवक्त तथा वडा नं ८ का अध्यक्ष प्रकाश श्रेष्ठ, वडा अध्यक्षहरु,कार्यपालिका सदस्यहरु, शाखा प्रमुखहरु,नेपाल पत्रकार महासंघका अध्यक्ष सीताराम अधिकारी लगायतको उपस्थिति रहेको थियो ।