जेष्ठ नागरिकको स्वास्थ्य अवस्था बुझ्न टोलटोलमा नीलकण्ठ ८ का स्वास्थ्यकर्मी

धादिङ,१८ पुस
नीलकण्ठ नगरपालिका वडा नम्बर ८ ले मासिक रुपमा टोलटोलमा गएर स्वास्थ्य परिक्षण कार्यक्रम सन्चालन गर्दै आईरहेको छ । वडा भित्रका जेष्ठ नागरिक र अपाङ्गता भएका व्यक्तिहरुको स्वास्थ्य परिक्षणमा सहज होस भनेर टोलटोलमा गएर स्वास्थ्य परिक्षण गरीएको नीलकण्ठ नगरपालिकाका प्रवक्ता तथा वडा नम्बर ८ का वडा अध्यक्ष प्रकाश कुमार श्रेष्ठले जानकारी दिनुभयो ।

स्वास्थ्य संस्थामा आउन नसक्नेहरुलाई लक्षित गरेर टोलटोलमा गएर स्वास्थ्य परिक्षण गरीएको श्रेष्ठले नीलकण्ठ एफएमलाई जानकारी दिनुभयो ।‘स्वास्थ्य अवस्था के छ, जोखिम कस्तो छ, दिर्घ रोग छ या छैन भन्ने बारे हामीले जाँच गरेर पहिचान गर्छौँ’ वडा अध्यक्ष श्रेष्ठले भन्नुभयोे ‘हरेक महिना भिन्न भिन्न टोलमा गएर स्वास्थ्य परिक्षण गरीरहेका छौ।’वडा भित्रका दिर्घरोग रहेका जेष्ठ नागरिक कसले कुन प्रकारको औषधि सेवन गर्छन् भन्ने यकिन गरेर नगरपालिकाबाट उपलब्ध हुने औषधीहरु निःशुल्क बितरण गर्ने योजना रहेको वडा अध्यक्ष श्रेष्ठले बताउनुभयो ।

वडामा रहेको स्वास्थ्य संस्थाका कर्मचारीले आफ्नो सेवा क्षेत्र भित्र रहेका जेष्ठ नागरिकलाई घरघरमा पुगेर भेट्ने, स्वास्थ्य जाँच गर्ने गर्छन्। स्वास्थ्यमा भएका सामान्य समस्यालाई बेवास्था गरेर बसेका जेष्ठ नागरिकलाई सचेत गराउँदै औषधी पनि निशुल्क दिइने गरेको स्वास्थकर्मी लक्ष्मी अधिकारीले जानकारी दिनुभयो । जेष्ठ नागरिकको स्वास्थ्य अवस्थाको बारेमा परिवारलाई जानकारी दिँदा समयमै उपचार गराउन र हेरचाह, खानपिनमा पनि सहजता आउने अपेक्षा गरीएको वडा अध्यक्ष श्रेष्ठले बताउनुभयो ।