ज्वालामुखी स्थित चक्रदेवी टोलमा मगर पुरोहित र सालैजु कौह्रा नाँचको तालिम हुने

धादिङ,१४ पुस
धादिङको ज्वालामुखी गाउँपालिका वडा नम्बर ३ चक्रदेवी टोलमा मगर पुरोहित(वापा मापा) र सालैजु कौह्रा नाँच तालिम सन्चालन हुने भएको छ । यहि पुष २२ गतेदेखी हुने तालिम सन्चालनको लागि फाराम खुलिसकेको नेपाल मगर संघ ज्वालामुखी गाउँ ईकाका अध्यक्ष कुल बहादुर झ्यारी मगरले जानकारी दिनुभएको छ।नेपाल मगर संघ ज्वालामुखी गाउँपालिकाको आयोजना र नेपाल मगर संघ जिल्ला समन्वय समिति धादिङको सह आयोजनामा सन्चालन हुने तालिममा ज्वालामुखी गाउँपालिका र नेपाल मगर बौद्ध सेवा समाज जिल्ला कार्य समिति धादिङको प्राविधिक सहयोग रहेको छ ।

२२ गतेदेखी सुरु हुने तालिमको लागि २१ जना मगर पुरोहित र २४ जना सालैजु कौह्रा नाँचको लागि कोटा निर्धारण गरीएको छ ।मगर जातिको भाषा,संस्कृति,परम्परालाई जीवन्त राख्नको लागि तालिमको आयोजना गरीएको नेपाल मगर संघ ज्वालामुखी गाउँ ईकाका अध्यक्ष कुल बहादुर झ्यारी मगरले जानकारी दिनुभयो । तालिम समापन सँगै माघे संक्रान्तिको अवसरमा मगर जातिको संस्कृति झल्कने खानाका परिकारहरु पाईनुको साथै उक्त दिन सांस्कृतिक कार्यक्रम पनि हुने आयोजकले जानकारी दिएको छ ।