अराजक गतिविधि निराकरण गर्न प्रधानमन्त्रिलाई ज्ञापनपत्र

धादिङ । लघुबित्तमा देखिएको हालको कमजोर शान्ति सुरक्षाको अवस्थालाई मध्यनजर गर्दै अराजक गतिविधि रोक्न धादिङका सहायक प्रमुख जिल्ला अधिकारी मार्फत प्रधानमन्त्रिलाई ज्ञापनपत्र बुझाईएको छ । नेपाल लघुबित्त बैकर्स संघको आह्वानमा धादिङमा भएका लघुबित्त संघ संस्थाहरुले सो ज्ञापनपत्र बुझाएका हुन् ।

लघुवित्त वित्तीय संस्थाहरु विरुद्ध विगत केही समयदेखि केही व्यक्ति तथा राजनीतिक समूहले “लघुवित्तीय विरुद्धको संघर्ष समिति”नामको अवैधानीक समूह खडा गरी सुनियोजित तवरले वित्तीय संस्था जस्तो अति संवेदनशिल क्षेत्रमा आन्दोलन गरेकोमा गरी कार्यक्रममा अवरोध गरेको भन्दै लघुवित्तहरुले सुरक्षाको माग गरेका हुन् ।

कार्यक्रममा अवरोध श्रृजना गर्ने,कपोल कल्पित आक्षेप लगाई अनर्गल प्रचार प्रसार गर्ने, वित्तीय संस्था जस्तो अत्यावश्यक सेवा अवरुद्ध गर्ने नियतले वित्तीय संस्थाको कार्यालयमा ताल्चा लगाउने, यस क्षेत्रमा काम गर्ने लघुवित्त कर्मीहरुलाई कार्यक्रम बन्द गर्न धम्की दिई मनोबल कमजोर गराउने,कर्मचारीहरु माथि हातपात गर्ने, रकम कलम लुटपाट गर्ने, सोझा साझा सदस्यहरुलाई वित्तीय सेवा उपयोग गर्न बाधा पुर्याई लघुवित्त कार्यक्रमलाई नै धराशायी गराउने जस्ता कानून विपरितका गतिविधि भईरहेको भन्दै लघुवित्तहरुले ज्ञापन पत्र बुझाईका हुन् ।
देशको संवैधानिक कानून भित्र रही सञ्चालन गरिएका व्यवसायमा प्रत्यक्ष आँच पु¥याउने, लाखौं जनताको बैंकिङ्ग प्रतिको भरोसालाई प्रत्यक्ष प्रभावपारी समग्र देशको अर्थतन्त्रमा नकरात्मक प्रभावपार्ने जस्ता गैर कानूनी गतिविधिहरु भैरहेकाले उक्त स्वार्थ समूहको आन्दोलनका नाममा भएका अवाञ्छित गतिविधि तत्काल बन्द गरी शान्ति सुरक्षाको आवश्यक प्रबन्ध मिलाउनका लागि लघुवित्त वित्तीय संस्थाहरुको छाता संगठन नेपाल लघुवित्त बैंकर्स संघले अनुरोध गरेको छ ।

यस्ता गतिविधिहरु निरन्तर चली रहने, राज्यको संयन्त्रबाट असहयोग हुने, र हालको सुरक्षा अवस्थामा सुधार नभएमा लघु वित्तवित्तीय संस्थाहरुले अझ कडा कदम चाल्ने र यसका सम्पूर्ण सेवाहरु बन्द गर्नुपर्ने जस्ता अप्रिय निर्णय लिन बाध्य हुने ध्यानाकर्षण पत्रमा उल्लेख गरिएको छ ।

हाल नेपालमा ६३ वटा लघुवित्त संस्थाहरुले ५ हजार १ सय ६४ शाखा मार्फत सेवा दिईरहेका छन् ।