वर्षायाम शुरु भएपछि धादिङका ४९ जनालाई डेंगु संक्रमण

धादिङ,३१ असार।

धादिङमा डेंगु रोगको संक्रमण बढदै गएको छ । वर्षायाम सुरु भएसँगै डेंगु रोगको संक्रमण बढदै गएको हो । पछिल्लो १ महिनाको अवधिमा धादिङका ४९ जनामा डेंगुको संक्रमण भएको स्वास्थ्य कार्यालय धादिङले जनाएको छ ।

बितेको १ महिना मात्रै धादिङ अस्पतालमा ४६, गजुरी प्राथमिक स्वास्थ्य केन्द्रमा २ र सल्यानटार प्राथमिक केन्द्रमा १ गरी धादिङमा ४९ जनालाई डेंगुको संक्रमण भएकोे स्वास्थ्य कार्यालय धादिङका जनस्वास्थ्य निरिक्षक जनार्दन सिलवालले जानकारी दिनुभयो । शुक्रबार स्वास्थ्य कार्यालय धादिङले आयोजना गरेको पत्रकारसँग अन्तरक्रिया कार्यक्रममा जनस्वास्थ्य निरिक्षक सिलवालले सो कुरा बताउनुभएको हो ।

अहिले केही संक्रमितहरुको धादिङ अस्पतलामा उपचार भईरहेको बताईएको छ । यसअघि डेंगु रोगको संक्रमणका कारण धादिङ अस्पतालमा उपचारत ज्वालामुखी गाउँपालिकाका ५६ वर्षिय रामचन्द्र श्रेष्ठको मृत्यु भएको थियो। जिल्लामा पछिल्लो समय डेंगुको संक्रमण तीव्र देखिएको छ ।

लामखुट्टेको वृद्धिका लागि उपयुक्त मौसम भएका कारण पनि डेंगुको संक्रमण तीव्र रुपमा फैलिएको हो । डेंगु एडिस (एजिप्टाइ) जातिका पोथी लामखुट्टेको टोकाइबाट संक्रमण हुने भाइरल ज्वरो हो । घाम उदाउने र डुब्ने समयमा यो लामखुट्टेले मानिसलाई टोक्ने गर्दछ । ज्वरो आउने, आँखा रातो हुने र दुख्ने, टाउको, पेट, जोर्नी र मांसपेशी दुख्ने, आलस्य हुनेजस्ता डेंगुका शुरुवाती लक्षणहरु हुन् ।

डेंगु रोगको संक्रमण पुष्टि भएका बिरामीले सामान्यतया दुखाइ कम गर्न र ज्वरो घटाउन सिटामोलको प्रयोग गर्न सकिने  छ । डेंगुका बिरामीले घरमै आराम गरेर प्रशस्त मात्रमा झोलिलो पदार्थ खानु उपयुक्त हुन्छ । पटक–पटक बान्ता हुने, पेट अचाक्ली दुख्ने, गिजा वा नाकबाट ¥याल बगिरहनेजस्ता लक्षणहरु देखा परेमा चिकित्सकको निगरानीका लागि अस्पताल जानुपर्छ ।

डेंगुको संक्रमण भएका व्यक्तिमा असाध्यै टाउको दुख्ने, आँखाको गेडी तथा आँखाको पछिल्लो भाग दुख्ने, ढाड, जोर्नी तथा मांसापेशी दुख्ने, शरीरमा बिमिरा आउने, वाकवाकी लाग्ने, पेट दुख्ने, नाक वा गिजाबाट रगत बग्ने, रक्तश्राव हुने वा शरीरमा रगत जमेको दागहरू देखापर्ने, बेहोस हुने आदि लक्षणहरू पनि देखा पर्न सक्छ ।

डेंगुबाट कसरी बच्ने ?

डेंगुबाट बच्ने मुख्य उपाय भनेकै लामखुट्टेको टोकाइबाट बच्नु हो । तसर्थ लामखुट्टेको वृद्धि रोक्ने उपयुक्त उपाय अपनाउन जरुरी हुन्छ । यसका लागि पानी जम्न सक्ने भाँडाहरू जस्तै गमला, फूलदानी, खाली बट्टा, अलकत्रा वा मट्टितेलका खाली ड्रमहरू, गाडीका काम नलाग्ने टायरमा पानी जम्न दिनुहुँदैन ।

पानीको ट्यांकीलाई लामखुट्टे प्रवेश गर्न नदिने गरी छोपेर राख्नुपर्छ । लामखुट्टेको टोकाइबाट बच्न बाहुला भएको वा शरीर ढाकिने लुगा लगाउनुपर्छ । सम्भव भएसम्म दिउँसो सुत्दा पनि झुल प्रयोग गर्नुपर्छ । साथै साना केटाकेटीलाई जुनसुकै समयमा पनि झुलभित्र सुताउनुपर्छ । लामखुट्टेको टोकाइबाट बच्न लामखुट्टे भगाउने मलहम दल्न पनि सकिन्छ । घरका झ्याल ढोकामा जाली लगाउनु उपयुक्त हुन्छ ।